Үөһээ Бүлүүтээҕи кииннэммит бибилэтиэкэ инникигэ хардыыта

Ыам ыйын 30 күнүгэр Өрөспүүбүлэкэтээҕи көрбөттөр анал библиотекаларын дириэктэрин солбуйааччы Алексеева С.В. уонна мин, бибилэтиэкэр Пухова С.И., Үөһээ Бүлүү улууһун олоҕор – дьаһаҕар, сайдыытыгар сүҥкэн суолталаах тэрээһиҥҥэ сылдьан кэллибит. Үөһээ Бүлүүтээҕи О. Федорова аатын сүгэр кииннэммит бибилэтиэкэ (директор Петрова Н.К.) “Биир тэҥ кыах эйгэтэ” диэн бырайыак оҥорон, 500 тыһыынчалаах Грант ыланнар, доруобуйаларынан хааччахтаммыт дьоҥҥо аналлаах саала арыйдылар. Манна чуолаан харахтарынан көрбөт уонна мөлтөхтүк көрөр дьоҥҥо аналлаах кинигэ суругун улаатыннарар “Топаз” уонна сырдык уокка көрөр “Сигма” диэн тэриллэри, көрбөт дьон үлэлииригэр аналлаах АРМ, икки тифлофлешплеерынан уонна анал кинигэнэн толору хааччыллыбыттар. Ону тэҥэ саҥа миэбэл уонна доруобуйаларынан хааччахтаммыт дьон сынньаналларыгар уонна эрчиллэллэригэр аналлаах велотренажеру сэргии көрдүбүт.

Кинигэ солбуллубат билии төрдө буоларын бары билэбит. Мөлтөхтүк көрөр уонна хараҕынан көрбөт дьону кинигэнэн хааччыйар сыалтан Үөһээ Бүлүү бибилэтиэкэтин кытта ыкса ситимнээхтик 2002 сылтан үлэлээн олоробут. Ол курдук, бибилэтиэкэр Прокопьева Елизавета Федоровна — саҕалаабыт үтүө үлэтин билигин Павлова Дария Николаевна кэҥэтэн, дириҥэтэн айа-тута сылдьарыттан олус үөрэбит. Билиҥҥи кэм ирдэбилинэн бибилэтиэкэ ыыра кэҥээтэ, аҥаардас кинигэ уларсыытынан эрэ муҥурдаммаппыт. Дария Николаевна бэрт сонун тэрээһиннэри иилээн – саҕалаан ыытар. Санатан ааһар буоллахха, «Лоокуут уонна Ньургуһун» (Т. Сметанин) тифлоспектакль Н. Островскай аатынан кулууп сыанатыгар туруоран сөхтөрбүтэ, онтон 2016 с. айар талаанын ыйар сулус оҥостубут, дьон – сэргэ истиҥ биһирэбилин ылбыт, бар-дьоҥҥо үөрүүнү сахпыт ырыаһыт, мелодист Константинова Мария Игнатьевнаҕа анаммыт  “Алаас – сыһыы күөрэгэйэ” диэн ааттаан, улахан көрсүһүүнү тэрийэн ыыппыппыт үгүс дьон сэҥээриитин ылбыта. Мария Игнатьевна айар үлэтин уонна олоҕун кэрчиктэрин сырдатар «Морууса» диэн киинэтин сүрэхтэниитэ буолбута. Былырыын саха норуодунай поэта Бүөтүр Тобуруокап 100 сылыгар аналлаах «Таптыырга буруй суох» диэн суруйааччы хоһооннорунан уус – уран дьүһүйүүнү куорат ааҕааччыларын болҕомтолоругар таһаарбыта эмиэ биир сонун көстүү буолбута.

Бибилэтиэкэ нэһилиэнньэни түмэ тардар, өй – санаа, култуура, билии – көрүү өттүн барытын хабар соруктаах. Наталья Кирилловна салайар кииннэммит бибилэтиэкэтэ Үөһээ Бүлүү социальнай харалтатын кытта, чуолаан, көрбөттөр уопсастыбаларын (бэрэссэдээтэл А.Н. Заболоцкая, сэк. – Иванова А.Т.) кытта ыкса ситимнээхтик үлэлиир.

Утуйар ууну умнан, күнүстэри – түүннэри тэрээһиҥҥэ бэлэмнэнии диэни бэркэ билэбит. Бииргэ үлэлиир кэллиэгэлэрбин уонна Үөһээ Бүлүүтээҕи кииннэммит бибилэтиэкэ иллээх кэлэктиибин Бүтүн Арассыыйатааҕы бибилэтиэкэлэр күннэринэн уонна үрдүк ситиһиилэринэн эҕэрдэлиибин! Өр кэмҥэ култуура эйгэтигэр үлэлээбит ааҕааччыбыт, суруйааччы, Дьокуускай куорат гимнын ааптара Христофор Горохов – Элгэстэй “Дьону үөрдэр – үрдүк дьол” диэн тылларынан түмүктүүбүн.

Пухова С.И.