Үбүлүөйдээх сылынан үйэлээх бэлэх

 

Өрөспүүбүлүкэтээҕи көрбөттөр анал библиотекалара харахтарынан доруобуйаларыгар хааччахтаах, олох араас эйгэтигэр ситиһиилээх дьону киэҥ араҥаҕа билиһиннэрэр, үйэтитэр сыаллаах үлэ араас көрүҥүн ыытар. Ол курдук,  самаан сайын эргиллибит үтүө-мааны кэмигэр, ыам ыйын 30 күнүгэр, библиотека   ааҕааччылара уонна ыалдьыттара биир кэрэ бэлиэ түгэҥҥэ тоҕуоруһа муһуннулар.

Сүүрүүгэ Саха Өрөспүүбүлүкэтин спордун маастара, «Физкультура уонна спорт сайдыытыгар үтүөлэрин иһин», «Гражданскай килбиэн» бэлиэ хаһаайына, 2010 сылга «Сыл бастыҥ киһитэ» ааты ылбыт, Россия рекордун Гиннеһин кинигэтигэр киирбит экстремал-сүүрүүк Петр Семенович Наумов туһунан «Хоптоҕо Хотойо – сүүрүк Бүөтүр» диэн кинигэ сүрэхтэниитэ буолан ааста. Саҥа кинигэ библиотека методико-библиографическай салаатыгар бэчээккэ бэлэмнэнэн, тифлоиздательскай салааҕа бэчээттэнэн таҕыста.

«Незрячие деятели Якутии» серия бастакы таһаарыытынан «Хоптоҕо Хотойо – сүүрүк Бүөтүр»  кинигэ буолара улахан суолталаах уонна эппиэтинэстээх. Петр Наумов олоҕун  уонна сүүрүүтүн туһунан хомуурунньукка үгүс ахтыылар, ыстатыйалар уонна биобиблиографическай ыйынньык киирдилэр. Экстремал-сүүрүк дойдубут  устун уһун сүүрүүлэрэ, Саха сирин эрэ буолбакка, Россия бэчээтигэр үгүстүк сырдатыллыбыттара. Биобиблиографическай ыйынньыкка бу баай ис хоһоонноох матырыйааллар түмүллэн киирбиттэрэ кинигэ ис тутулун байытан, ситэрэн-хоторон биэрэрэллэрэ саарбаҕа суох.

Кинигэ аан тылын Саха Өрөспүүбүлүкэтин Ил Түмэн Судаарыстыбаннай мунньаҕын ыччат дьыалаларыгар, физическэй култуураҕа уонна спортка сис кэмитиэтин бэрэссэдээтэлэ, норуот депутата Михаил Дмитриевич Гуляев суруйар. «Петр Семенович историяҕа хаһан да буолбатах ситиһиини ситиһэн, дьулуурун, тулуурун, күүстээх бөҕө санаалааҕын көрдөрбүтэ. Кэнчээри ыччакка, дьоҥҥо-сэргэҕэ физкультуранан уонна спордунан дьарыктаннахха, чөл олоҕу тутустахха киһи үрдүк чыпчаалы ситиһиэн сөптөөҕүн бигэргэппитэ», – диэн тоһоҕолоон бэлиэтиир.

Үөрүүлээх күн ыалдьыттара: Өрөспүүбүлүкэтээҕи көрбөттөр уопсастыбаларын бэрэсэдээтэлэ, СӨ култууратын үтүөлээх үлэһитэ Ишниязов Ибрагим Михайлович, экономическай наука профессора, СӨ норуотун хаһаайыстыбатын үтүөлээх үлэһитэ Тумусов Платон Терентьевич, тыа хаһаайыстыбатын туйгуна Герасимов Алексей Петрович уо. д. а. истиҥ-иһирэх тыллары, үтүө баҕа санаалары эттилэр. Модун санаалаах кинигэ дьоруойун уонна кэлбит ыалдьыттары, СӨ культуратын үтүөлээх үлэһитэ, Дьокуускай куорат көрбөттөр уопсастыбаларын бэрэсэдээтэлэ Спиридонов Николай Михайлович уонна эдэр талаан Валентин Суздалов ылбаҕай ырыаларынан эҕэрдэлээтилэр. Петр Семенович Наумов төрөппүт кыыһа,  С.А. Зверев-Кыыл Уола аатынан үҥкүү театрын артыыската, Мария Заболоцкая эҕэрдэ үҥкүүтүнэн биэчэри киэргэттэ.

Хоптоҕо Хотойун Сүүрүк Бүөтүрү үбүлүөйдээх сылынан эҕэрдэлээн туран, сылаас көрсүһүүттэн кынаттанан, иннин диэки чэпчэкитик сүүрэн иһэриҥ курдук, уһун олох устун дьоллоохтук айанныыргар баҕарабыт.

 

Ульяна Чичигинарова, методико-библиографическай салаа библиотекара

 

 

 

 

 

 

 

 

 

 

Оставить комментарий