КҮӨХ САЙЫНЫ УРУЙДААН…

 

Ырыа-тойук аргыстаах, дьоһун-мааны дьоннордоох Дьокуускай куорат көрбөттөр уопсастыбаларын быйылгы ыһыаҕа, бэс ыйын 18 күнүгэр бэрт сэргэхтик ыытылынна. Үс Хатыҥ ытык сирэ чээлэй күөх көбүөрүнэн тэлгэнэн, күндү көмүс күөмэйдээх күөрэгэй ырыатынан угуттанан, дьикти кэрэ сибэккилэринэн симэнэн, тупсуоҕунан-тупсан ыһыах ыалдьыттарын көрүстэ.

Саха үгэһинэн ыһыах Үрдүк Айыылартан,сир-дойду иччилэриттэн уйгуну-быйаҥы көрдөһөр алгыһынан арылынна. Дьокуускай куорат социальнай харалта управлениятын салайааччыта С. И. Матвеев уонна уопсастыба бэрэсэдээтэлэ Н. М. Спиридонов ыһыах дьонун эҕэрдэлээн тыл эттилэр, наҕараадалары туттардылар.

 Салгыы күн оройо, саха мааны аһын хото тардан, кыынньар кымыс уонна үтэһэлээх эт амсайан, күүс-уох ылынан ыһыах оонньуута саҕаланна. Саха талба таҥаһын көрүү, сүүрүү, ыстаҥа, мас тардыһыы күрэхтэригэр эдэрдиин-эмэнниин көхтөөхтүк кыттан күүстэрин холоннулар. “Голос ВОС” ырыа күрэҕэ ыытыллан, ыһыах үөрүүтүн өссө үрдэттэ. Талааннаах ырыаҺыт, ырыа айааччы Алексей Потапов ылбаҕай ырыатынан, тылынан-өһүнэн, музыканан киэргэтэн бар дьонун махталын ылыан ылла.

Ити курдук оонньууну оройуттан тутан, астына сынньанан, самаан сайын биир маанылаах күнүн дуоһуйа атаардыбыт. Айылҕабыт барахсан чаҕылхай күннээх сайыҥҥы күнү туран биэрэн, сөрүүн тыалынан сөрүүкэтэн анаабыт курдук оҥорбута үчүгэйин!

Ульяна Чичигинарова

Оставить комментарий