Кэтэхтэн викторина түмүгэ

Арассыыйа бэрисидьиэнэ В.В. Путин ыйааҕынан быйылгы, 2019 сыл, Арассыыйаҕа Театр сылынан биллэриллибитэ. 

Өрөспүүбүлэкэтээҕи көрбөттөр анал библиотекалара сыл аайы араас хабааннаах кэтэхтэн литературнай викториналары ыытара үгэскэ кубулуйда. Элбэх сыллар усталарыгар Сахабыт сирин бары муннуктарыттан оҕо-аймахтан саҕалаан, биэнсийэлээх ытык кырдьаҕастарбытыгар тиийэ, викториналарбыт ыйытыктарыгар сөптөөх хоруйдары ыыталлар. Быйылгы күрэхпит 2019 сыл чэрчитинэн – Театр сылыгар ананна. “Якутия театральная” диэн ааттаах викторинабыт боппуруостарын Сахабыт сирин театрдарын историятынан, сүрүн кэрдиис кэмнэринэн, саха норуотун аар – саарга аатырдыбыт режиссердарбыт туруорууларынан, киэн туттар артыыстарбытынан оҥордубут. Биһиги библиотекабытыгар сахалыы кинигэлэрбитин П.А. Ойуунускай аатынан Саха академическай театр артыыстара: К. Семенов, Е. Потапова, З. Попова, Н. Ушницкая уо. д. а. «саҥардыбыт» буоланнар, хайдах эрэ ааҕааччыларбытыгар викторинабыт чугас буолла. Үлэлэр Хотугу Муустаах байҕал кытылыттан саҕалаан, алмаастаах Мииринэйтэн, таас чохтоох Нерюнгриттэн тиийэ киирдилэр. Саамай көхтөөхтүк Хаҥалас улууһун Булгунньахтааҕыттан Ноева М.П., Петрова Ю.А., Тумулуттан – Прокопьева М.В., Нерюнгри куораттан – Алексеева Г.И., Цыльке Н.Н., Идаятова Т.З. кытыннылар. Омос көрдөххө, судургу баҕайы боппуруостар курдук эрээри, эрэйдэнэриҥ, хасыһарыҥ элбэх. Ол да иһин, 20 боппуруоска толору, чаҕылхай эппиэттэри биэрэн, Ефимов Петр Павлович (Таатта улууһа, Чычымах) бастаан таҕыста. Петр Павлович педагогическай үлэ бэтэрээнэ, күн бүгүҥҥэ дылы кэргэнинээн, Татьяна Васильевналыын, араас таһымнаах бальнай үҥкүү күрэхтэригэр эдэрдии эрчимнээхтик кытталлар, кыайыы өрөгөйүн билэллэр. Иккис миэстэни – Хлебодарова Ирина Борисовна Мииринэйтэн ылла. Ирина Борисовна саха норуодунай суруйааччытыгар Софрон Даниловка анаммыт литературнай викторинабытыгар кыттан, бириистээх миэстэҕэ тиксибитэ. Үһүс – Нам улууһун көрбөттөрүн уопсастыбатын бэрэссэдээтэлэ Соловьев Алексей Николаевич буолла. Алексей Николаевич идэтинэн режиссер, онон театр тиэмэтэ киниэхэ чугас буолуон сөп. Кыайыылаахтар грамотаны уонна сэмэй бэлэхтэри, викторина кыттыылаахтара сэртипикээт тутуохтара.

Бары ааҕааччыларбытыгар махтанан туран, инникитин даҕаны библиотека ыытар тэрээһиннэригэр көхтөөхтүк кыттыахтара диэн эрэнэбит!

Пухова С.И., библиотекарь

Оставить комментарий