«Норуокка анаммыт олох»

           Саха сирин уhулуччулаах советскай партийнай, государственнай салайааччыта Илья Егорович Винокуров төрөөбүтэ 125 сылыгар анаммыт «Норуокка анаммыт олох»  тэрээһин үгүс ааҕааччыны, ыччаты, оҕону түмтэ.

        Бу дириҥ суолталаах тэрээһин Өрөспүүбүлүкэтээҕи көрбөттөр анал библиотекаларын иһинэн үлэлиир «Интэриэһинэй көрсүһүүлэр» кулууп үлэтин чэрчитинэн ыытылынна.

       Саха сирин сайдыытыгар сүдү кылаатын киллэрбит уһулуччулаах салайааччы Илья Егорович Винокуров 1896 сыл тохсунньу 1 күнүгэр Нам улууһугар  төрөөбүтэ. Кини олорбут олоҕо, үлэлээбит үлэтэ бүтүн норуот историятын кытары ыкса ситимнээх, сүдү оруоллаах. Үтүө киһи аата үйэлэгэ умнуллубат диэн этиллэринии, Илья Егорович төрөөбүтэ 125 сыллаах үбүлүөйэ норуотун махталынан, ытыктабылынан республика үрдүнэн киэҥ далааһыннаахтык бэлиэтэнэр.   

        Ол эрэн, чуолаан ыччат кини олоҕун, үлэтин, норуотугар онорбут үтүөтүн ситэ билбэтэ баар суол.

        Библиотека ааҕааччыларын, ыччаттары түмэн куйаар ситимин нөҥүө чулуу киһи туһунан истиҥник-иһирэхтик кэпсэттибит.  Көрсүһүү ыҥырыылаах ыалдьытттарынан биир дойдулааҕа,   М.К. Аммосов аатынан Судаарыстыбаннас түмэлин  сэбиэдиссэйэ Кириллин Александр Васильевич, Чурапчы улууһун Хатылы нэһилиэгин «Көһөрүллүү» түмэлин үлэһиттэрэ Чичигинарова Марфа Владимировна уонна  Кузьмина Мария Анатольевна кыттыыны ыллылар.

         Илья Винокуров, будулҕаннаах XX үйэ саҕаланыыта, олох саамай тыйыс бэрэбиэркэлээһиннэрин ааспыт кэмигэр төрөөн-үөскээн, онно буһан-хатан тахсыбыт дьонтон биирдэстэрэ. Гражданскай сэрии, саҥа сэбиэскэй олоҕу тутуу, холкуостааһын, Аҕа дойду Улуу сэриитин ыар сыллара, сэрии кэнниттэн саҥа олоҕу тутуу курдук уустук кэмнэри этинэн-хаанынан, өйүнэн-санаатынан бүүс бүтүннүү билэн, инники күөҥҥэ сылдьыбыт киһи килбиэннээҕэ, олох бэйэтэ эрийэн-мускуйан таһаарбыт уһулуччулаах салайааччы буоларын Александр Васильевич кэпсээниттэн сөҕө иһиттибит.

        «Илья Винокуров бэйэтин норуотун уоттаах сэрии сылларыгар аччыктаан өлүүттэн быыһаабыта» диэн бар дьон махталын ылыан ылар.  Аҕа дойду улуу сэриитин сылларыгар, сут-кураан турбутугар Чурапчы оройунун колхуостарын күүс өттүнэн тус хоту  балыктааһыҥҥаа көһөрбүттэрэ. Тыһыынчанан киһи аччыктаан, тоҥон, ыалдьан өлбүттэрэ. Бу кытаанах кэмнэргэ өрөһүлтэ буолбут, эрэйи чэпчэппит киһиниэн  кини буолар. «Көһөрүллүү» түмэлин сүрүннүүр үлэһитэ Чичигинарова Марфа Владимировна  интэриэһинэй кэпсээнэ, онлайн-экскурсията тэрээһин кыттыылаахтарын болҕомтолорун, сэҥээриилэрин ылла.

       Бүгүҥҥү олохпутугар ZOOM нөҥүө көрсүһүүлэр, кэпсэтиилэр үчүгэй, табыгастаах өрүттэрэ  элбэҕинэн бигэтик киирдэ. Саха сирин араас муннуктарыттан 112 кыттааччы холбонон, киэҥ хабааннаах тэрээһин буолла.

       Саха сиригэр оччотооҕу саҥа олоҕу тутуу сылларыгар үөрэх, наука, техника, доруобуйа харыстабыла, промышленность бүттүүн балысханнык сайдар кэмнэригэр суолталаах, быһаарыылаах үлэни ыыппыт, салайсыбыт саха саарынын – Илья Егорович Винокуров сырдык аата үйэлэргэ ааттана туруо!

Ульяна Чичигинарова

 

 

 

Оставить комментарий